أعتقد كفاية جدًا كل اللي بيحصل حوالينا في البلد دا، و إحنا قاعدين نتفرج و نقتل في بعض في طوابير العيش. و الأسعار بترتفع أكتر من أربع مرات في معظم المأكولات و الحكومة تقول ان الزيادة 12% (التضخم). و في نفس الوقت بيقولوا ان مصر فيها معدل نمو اقتصادي عالي قوي، و الشوارع مقفولة من العربيات... طب فين؟
حتى لو مكنتش بتعاني من المشاكل دي كلها، و لا الموضوع فارق معاك و ربنا بيرزقك من حيث لا تحتسب. برضه متبقاش سلبي... المسألة مش مسألة فلوس و بس، دي مسألة إستبداد و سلطة بلا حدود و تزوير و سلب إرادة. فساد و رشاوى. حديد زاد يمكن تلات أضعاف في اقل من سنة. شقة معدناش حتى عارفين نحلم نجيبها. حرية بنسمع عنها في الأخبار. كفاية قوي كده، و مش معقول هنفضل قاعدين حاطين إيدنا على خدنا و نقول أهو بكرة تتعدل... مش هتتعدل غير لو عدلناها بإيدينا...
و إحنا لا بنقول ثورة، و لا صداع، و لا أي حاجة... كل اللي بنقوله ان الناس تاخد أجازة يوم 6 إبريل (أظن مافيش أسهل من كده) تاخد أجازة و تشارك في تحرير البلد كمان. و الجميل ان لا حد هيجري وراك و لا تخاف تضرب في مظاهرة ولا أي حاجة خالص. انت هتقعد في البيت معزز مكرم ولا أي حاجة خالص.
طيب أضعف أضعف الإيمان، لو مش قادر تريح يوم، متشتريش حاجة يوم 6 إبريل... لازم الناس اللي فوق دول يحسوا بكل الناس اللي اتداس عليها، و بقت حتى رغيف العيش مش لاقياه. قول "لأ" و لو لمرة، قول "لأ" ولا بالقعدة في البيت.
يا ريت ننشر الرسالة دي لكل الناس، أنا نشرتها و بعتها... إنشرها و ابعتها انت كمان....
Comments
Post new comment