الشعب المصري بصراحة شيء مؤلم، و لو جت الديموقراطية نفسها تحكمه ح تتحول إلي ديكتاتورية بدون نقاش! لأنه شعب محتاج "بابا" يوجهه و يتحكم فيه… د. علاء الأسواني بيقول في رائعته عمارة يعقوبيان علي لسان كمال الفولي (اللي ملهوش علاقة خالص بكمال الشاذلي)
"الناس الساذجة فاهمين اننا بنزور الإنتخابات .. أبدًا.. كل الحكاية إننا دارسين نفسية الشعب المصري كويس …. المصريين ربنا خلقهم في ظل حكومة .. لا يمكن لأي مصري يخالف حكومته .. فيه شعوب طبعها تثور و تتمرد إنما المصري طول عمره يطاطي لاجل يأكل عيش .. الكلام ده مكتوب في التاريخ، الشعب المصري أسهل شعب يتحكم في الدنيا .. أول ما تاخد السلطة المصريين يخضعوا لك و يتذللوا لك و تعمل فيهم علي مزاجك .. و أي حزب في مصر لما يعمل انتخابات و هو في السلطة لازم يكسبها لأن المصري لازم يؤيد حكومته .. ربنا خلقه كده.. "
و في الواقع الخطأ اللي واقعة فيه أحزاب المعارضة و منظمات المجتمع المدني و المثقفين و العلمانيين و الإخوان و غيرهم إنهم مخدوش بالهم من النقطة دي و بيتصارعوا علي كرسي عمرهم ما ح ياخدوه، إلا إذا… إلا إذا كانوا عارفين الموضوع ده كويس و بيجهزوا نفسهم لبدأ ديكتاتورية جديدة! مش مهم ح تكون إيه بس بلا شك ح تكون ديكتاتورية جديدة! لأن في الواقع الرئيس مبارك كان فائز فائز، بتزوير أو بغير تزوير، نسبة الفوز بس هي اللي كانت المشكلة! و كان لازم يكون الهامش كبير عشان نجيب يأس و إحباط لبعض الثوريين الصغيرين، و نثبت فكرة التزوير في دماغ بعض الثوريين الكبار عشان ينسوا عامل الناس تمامًا! أما اللي بيستعدوا لديكتاتورية جديدة فالحكومة عارفه تلاعبهم ازاي كويس قوي!
و في الحقيقة (و للأسف) الحكومة واخدة بالها من الشعب أكتر بكتير من المعارضة، و الشعب يعرف الحكومة أكتر بكتير من المعارضة، اللي مبتبانش و مش ح تبان غير في الإنتخابات… طبعًا باستثناء الإخوان المسلمين. لكن الكل، بما فيهم منظمات المجتمع المدني، محدش في المطلق بيهتم بالوعي السياسي للناس, يعرفهم ان ليهم واجبات و حقوق! يعرفهم انهم ممكن يقولوا لأ! يقولهم كفاية مشي جمب الحيط! يقولهم لما حد يظلمكم قولوله لأ! و المفروض دي كلها مؤسسات ليها شعبية واسعة و قادرة علي إحداث تغيير! و مع احترامي لحركة كفاية لو جابوا ملاك علي رأس مصر بدل مبارك ستستمر كديكتاتورية! الشعب المصري شعب سلبي و جبان (و حمال أسية) و دي أول حاجة المفروض نشتغل عليها و لو خدت 100 سنة و بعد كدة نبدأ نشوف ح نعمل إيه!
يمكن اللي صحاني علي المأساة دي "تحريك" أسعار الوقود… و كلمة تحريك دي كان علي مقالة صغيرة بجريدة الأهرام في مكان يتيم بصفحتها الأولي في عدد الجمعة الماضية، بزمتك حد سمع عن تحريك للأسعار قيمته 33%! أمال لو كانوا زودوا الأسعار كانوا عملوا ايه؟ و الحكومة مشكورة زودت تمن تذكرة المترو من 75 قرش إلي 100 قرش، بزيادة 33% في السبت الأول من الشهر الجاري (يوليو) و بداية الأسبوع زودت أسعار الوقود بالنسبة ذاتها، يعني الناس ملحقتش تهرب من زيادة أسعار المترو للميكروباصات فزادت تكلفة الميكروباص! العديد من الخطوط زادت اسعارها! و الموضوع مجاش علي الوقود بس، دا انا سمعت ان سعر جركن الزيت زاد من 16 جنيه إلي 29 جنيه… و رسوم الطرق السريعة زادت بنسبة 100% (المصدر جريدة المساء 22 يوليو 2006)!! يعني طريق إسكندرية بقت 5 جنيه بدل 2 جنيه (و العهدة علي الراوي)! موضوع اسكندرية إن هم الأول كانوا بيخدوا الرسم عند أول الطريق 2 جنيه، و بعدين بقوا ياخدوه علي آخر الطريق 2 جنيه كمان (يعني طالع دافع، نازل دافع) بعدين خلوها 5 جنيه و ريحوا دماغهم!!! و دا فكرني بنكتة و لا أجمل تصف الحالة اللي وصلنالها (و هم يضحك و هم يبكي)…
الريس عايز يزود شعبيته فقال لرئيس الوزراء يغلي الأسعار فالناس تتضايق يقوم هو ينزلها، فعلا رئيس الوزراء زود الأسعار، بس الناس ما اتكلمتش، عادي خالص!!!
الريس استغرب قوي، وقاله: طب خلي الضرايب على المرتبات خمسين للمية. زود رئيس الوزراء الضرايب خمسين فى المية، الناس هزت دماغها وسكتت.!!!
الريس اتجنن وقال لرئيس الوزرا بص، طلع أي قرار غشيم من عندك يخلي البلد تولع، رئيس الوزرا عمل ضريبة اللي يعدي كوبري يدفع عشرة جنيه، الناس نفخت و ضربت كف بكف ودفعوا!!!
فقام رئيس الوزرا خلى اللي يعدي يدفع عشرة جنيه وهو طالع، وعشرة جنيه وهو نازل من الناحية التانية، الناس قالت اللهم طولك يا روح و أمرنا لله و دفعوا!!!
رئيس الوزرا كبرت فى دماغه، وأمر إن اللي يعدي بعد ما يدفع عشرة جنيه، و هو خارج من الكوبري ياخد على قفاه… مفيش فايدة!!!
نزل الريس بنفسه متنكر يتابع الموقف، الناس تدفع وهية طالعة الكوبري عشرة جنيه، و عشرة جنيه و هية نازلة و تاخد على قفاها وتمشي…
شوية و لقى واحد بيزعق و متضايق، وطى على ودنه قال له "مالك؟" قال له "حاجة تقرف! أنا متعطل هنا بقالي خمس ساعات..ما ينفعش كدة ..لازم يزودوا الناس اللي بتدينا على قفانا!!!!!!!!"
Comments
Post new comment